Ísland er í forystu fyrir alþjóðlegri raðtilnefningu á minjum frá víkingatímanum í samræmi við ákvörðun ríkisstjórnarinnar frá 10. ágúst 2007. Unnið er að því að setja staði sem tengjast menningu víkinga á heimsminjaskrá UNESCO í samstarfi við Danmörku, Lettland, Noreg, Svíþjóð og Slésvík-Holtsetaland. Í þessari raðtilnefningu munu vera staðir sem þegar eru fyrir á skránni, s.s. Þingvellir, Birka og Hovgården í Svíþjóð og grafhaugarnir og kirkjan í Jellinge í Danmörku auk nokkurra nýrra staða sem þjóðirnar leggja til, alls níu staðir.

Hvert þátttökuríki undirbýr sinn þátt í raðtilnefningunni og hefur verið haft samráð við starfsmenn Þingvallaþjóðgarðs í aðdraganda verkefnisins. Nauðsynlegt er að hafa náið samstarf við Þingvallanefnd vegna þessa verkefnis.

Þetta er flókið og mikilvægt verkefni sem nýtur athygli á alþjóðavísu enda er hér um nýja nálgun við heimsminjasamninginn að ræða. Fornleifavernd ríkisins hefur verið falið að halda utan um alþjóðlega hluta verkefnisins. Agnes Stefánsdóttir er verkefnastjóri. Verkefninu er stjórnað af alþjóðlegri verkefnisstjórn sem skipuð er fulltrúum þátttökuríkjanna. Formaður verkefnisstjórnarinnar er Ragnheiður H. Þórarinsdóttir.